《船灣人》大埔地區出版

館長住喺大埔，好喜歡呢個社區基本上新舊城鄉生境齊晒，環境舒服好宜居。而作為大埔之一嘅船灣，同樣擁有豐富嘅地景，單憑幾期《船灣人》出版能略知一二。有談及區內嘅小店故事，街坊嘅舊日回憶、對周圍自然環境嘅讚賞，仲有持續報道區內貓狗、野生動物嘅資訊。



《船灣人》嘅定位似乎頗有一個願景，係鼓勵社區各人可以付出個人少少力量參與社區，帶動大家延伸想想讀者個人可以發揮的角色。第七期（2023年1月）出紙有兩款，一款如常針對船灣區內嘅人同事，主題故係講區內一家即將結業嘅小店，回顧疫情前後小店（店主）變與不變；另一款係號外，以社會步入疫情尾段切入，好像先做定「預告」社會喺疫情完結後所面臨嘅「後遣症」；又着墨回顧在囚人士、清潔工喺疫情期間面對嘅困局同外界支援嘅實況。呢期號外關注點係屬於一種面向社會嘅反思。


此報由早期一張大開紙雙面長方型摺，變為而家嘅正方形摺，變得更方便攜帶同收納。不過無論長方或正方，館長有感視覺上嘅內容劃分略有混亂，情況唔係出現喺個別版面中，而係整體排版中，難以辨別所屬版面及內容，亦不時要翻上下掉轉閱讀。如果喺排版設計上，能建立一套能清晰協助辨別不同內容、版頁嘅視覺識別（visual visual identity），就更加理想。



截至現時，《船灣人》出紙到第七期（2023年1月）。

@shuenwaners

********
此為臨時庫存館藏，歡迎查閱。
********